AMFU IN MIZORAM PAWN A OFFICE PAWIMAWH THENKHAT A DAWR KUAL

ALL MIZORAM FARMERS’ UNION (AMFU)

REPORTS OF OFFICIAL TOUR DURING 27.9.2016 TO 9.10.2016

Official Tour Members:

1. Pu Zion Lalremruata, General Secretary, AMFU Gen. Hqrs. Aizawl

2. Pu Lalbuatsaiha, Project Officer, AMFU Gen. Hqrs. Aizawl

3. Tv. TC Lalrinsanga, Technical Officer, AMFU Dist Hqrs. Lunglei.

Detailed Report:

AMFU Executive Committee meeting vawi 7-na ni 31.8.2016 a neihin a lo rel tawh angin, AMFU hmalakna bawhzui leh kuthnathawktute hmasawnna turin Company leh Sorkar office pawimawh tak tak, India ram hmun hrang hrang a mite dawr kual turin a chunga hming tarlante an kal a. He Official tour hi Pu Zion Lalremruata, General Secretary, AMFU chuan a kaihruai a ni.

Ni 27^th September, 2016 Tuesday khan Aizawl chhuahsanin, hemi ni vek zan dar 8:25 pm-ah kan hma chhawp hmasa ber awmna hmun Pollachi, Coimbatore kan thleng a. A tuk ni 28.9.2016 ah Vanilla chin kawnga Contract Farming neih tum chungchang a thil pawimawh hrang hrang te Eurovanile Company hotute nen sawihona neih a ni. Tluang tak leh uluk taka sawihona neih a nih hnuah Eurovanile Company te hmun hma – office hrang hrang leh Vanilla an sawngbawl dante chu a hmunah ngei an tlawh kual a. Heng an hmunhmate hi ropui an hle a, Europian standard niin an rintlak hle niin AMFU aiawhte hian an hmu a ni.

Ni 29.9.2016 Thursday hian Coimbatore atangin New Delhi ah an pan leh a, tlai thimhlim ah New Delhi an lut a. Ni 1.10.2016 Saturday khan Asia khawmualpuia Thlaithar (Chawhmeh leh Thei) zawrhna hmun lian ber Azadpur Mandi, New Delhi chu tlawhin, thlai thar rate leh an zawrh dan bakah, market lian tak an kalpui dante a hmunah enfiah a ni a. He market enkawltu (APMC) officer fel tak tak leh an hraitu lian ten AMFU aiawhte hi an lo dawngsawng a. Mizorama kan thlai tharchhuahte hralh ve dan kawng a awm em tihte, Market an enkawl dante chu Mizoramah tih ve theih a ni em tih te an zir a. He inkawmhona atang hian thil pawimawh leh tangkai tam tak an hriat belh a ni.

Ni 2.10.2016 Sunday khan New Delhi atangin Guwahati an an pan leh a, tlai thim dawnah Guwahati an lut a. Guwahati ah kuthnathawktute tana pawimawh office thenkhat tlawhin mi pawimawh tak tak te nen hmalakho dan tur sawiho a ni a. Ni 3.10.2016 Monday khan tukthuan eikhamah Spices Board of India, Ministry of Commerce office an dawr a. Deputy Director leh a thawhpuite chuan AMFU aiawhte chu a lo dawngsawng a. AMFU leh Spices Board of India te hmalak tawh dante leh, hun lo la awm zel tura kuthnathawktute dawmkanna tur kawnga thawhho dantur sawiho a ni a. Spices Board of India hotute hi an lo felin AMFU an ngaipawimawh zia an ti lang a, a lawm awm hle.

Hemi ni vek hian kuthnathawktute thlai thar sawngbawl leh hralhna kawnga North East India a hmalatu NERAMAC office, Guwahati dawr leh nghal a ni a. Pu Shri S. Bhattacharjee, Executive Director NERAMAC chuan AMFU hruaitute hi a lo dawngsawng a. Hemi hnuah hian NERAMAC a an hotu ber Pu Pankaj Kumar Prasad, Managing Director chu kawm leh nghal a ni a. Managing Director hi NERAMAC ah mi thar a ni a, AMFU hruatuten an tlawh ni hi a hna a zawm ni chiah a ni nghe nghe a. AMFU hmalaknate hrilh hriat a nih chuan a lawm hle a, AMFU leh NERAMAC thawhho dan turte, kuthnathawktute dawmkanna kawnga NERAMAC hmalaknaah AMFU chu an pawimawh hle dawn a ni tih phur takin a lo sawi a ni. AMFU nen Seminar/Workshop huaihawt thuai an duh thu te bakah, AMFU in NERAMAC kaltlanga hmalak an duhdan te chu ziaka thehlut turin AMFU hruaitute chu thu a rawn a, an lawm hle.

Ni 4.10.2016 Tuesday khan AMFU hmalak zelna tur leh Eurovanille Company leh AMFU thawhhona tur kawnga inpuahchahna tangkai tak, North East India a Vanilla chinna hmun Williamnagar, Meghalaya an tlawh a. Chhun dar 1:00 PM velah Williamnagar an thleng a, Vanilla chingtu, kuthnathawktu taima tak maite chu a hmunah an va kawm a. Kuthnathawktu harsa ve takte tan Vanilla chu chin ve chi a ni em tihte, enkawl a hautak leh hautak lohte, a huanah ngei an va tlawh a. Kan rama kuthnathawktute tan pawh Vanilla chu thil enkawl harsa lem lo tak, mi taima tan chuan hlawhtlinpui theih ngei niin AMFU aiawhte hian an va hmu a. A huanah ngei AMFU aiawh ten an tlawh avanga an lawmthute chu Williamnagar a loneitute chuan hahipin an lo sawi a, hlim taka an inkawmho hnuah Guwahati lamah an let leh nghal a ni.

Ni 5.10.2016 Wednesday khan NEIST, Jorhat lam an pan leh a. Ni 6.10.2016 Thursday chhunah AMFU tana mi tangkai tak Dr Saikia, Scientist, NEIST chu hmuh a ni a. Hemi hnu hian NEIST a an hotupa ber Dr D Ramaiah Director CSIR - NEIST Jorhat nen meeting neih leh a ni a. AMFU leh NEIST hmalak mekna te leh hun lo la awm tura hmalak zel danturte, kuthnathawktute dawmkanna tur a hmathar lakho dan kawngte sawiho a ni a. Hmalak ho dan tur leh hmathar lak dan tur a AMFU in kan duhdante chu a thuphungin pawm a ni a, ziaka bawhzui turin phur takin AMFU hruaitute hi a lo hrilh a ni. CSIR NEIST Director leh a thawhpuite hian hlim takin AMFU hi an lo dawngsawng a. Hemi zawh hian AMFU hruaitute hian Dimapur lam an pan zui nghal a ni. Tlaiah Dimapur an thleng a, NEFF Secretary te chhungkua chuan zanriah tui tak an lo siamsak a, an lawm hle.

Ni 7.10.2016 Friday khan Central Institute of Horticulture, Medziphema an tlawh a. Dr Lallan Ram, Director CIH nen meeting neih a ni a. AMFU hmalakna kawng a CIH, Medziphema te tawiawmnaah lawmthu te sawi pahin, hmalak zel dantur sawipui a ni a. Director hi a lo fel em em a, AMFU te nena hmalak chu CIH tan pawh a phurawm hle a, Mizoram pawh tlawh ve ngei a duh thute a lo sawi a. AMFU hmalaknate a hriatin chhuanawm a tih thu a lo sawi a ni. AMFU nen kuthnathawktute tan Training engemaw zat huaihawt turin ruahmanna siam nghal a ni. A office ah ngei AMFU hruaituten an tlawh leh an dawr chu a lawmthu a lo sawi a ni.

Hemi ni vek hian Tourist Lodge Conference Hall, Dimapur, Nagaland-ah NEFF meeting pawimawh tak neih a ni a. He hunah hian Pu Zion Lalremruata, General Secretary AMFU cum NEFF Secretary General chu a tel a. North East pum huapa kuthnathawktute dawmkanna tur leh hmalakna tur kawng hrang hrang an sawiho a ni.

AMFU Official Tour in a an tihtur bi tuk chin chu Pathian hruaina zarah tluang takin an hlenchhuak a, official a tihtur bituk bakah Office pawimawh tak tak leh mi pawimawh tak tak an dawr tel nghal teuh a ni. Ni 7.10.2016 khan Dimapur atangin Guwahati an pan leh a, Ni 9.10.2016 Sunday khan tluang takin Aizawl an lo thleng leh ta a ni. He an zin chhunga hriselna leh chakna petu Pathian chungah leh anmahni lo tawiawmtu AMFU hruaitu leh members zawng zawngte bakah an zinna hmuna lo dawngsawngtu fel tak takte chungah thinlung takin lawmthu an sawi a ni.