Report of Seminar on Green Revolution & Changkham Technology

MIZORAM FARMERS’ SEMINAR

ON

Green Revolution and Changkham Technology

Place   : Conference Hall, Directorate of Agri. Deptt.

Time    : 31^st May, 2016 (10:00 am - 4:00 pm)

THU HMA:

All Mizoram Farmers’ Union (AMFU) hi kum 1994 November ni 12 ah Loneitu inthurual ten an din a ni a. Mizoram a kuthnathawktu (Farmers) chhungkaw tin ten, leilung behchhana tuchhuan daih eizawnna nghet an neih chu a tum ber a ni a. Chumi tihlawh tling tur chuan kawng hrang hrangin AMFU chuan hma a la a. He a hmalakna kawngah hian mimal leh pawl mai bakah, sorkar atang te in kawng awm thei an gang a dap kual thin a. Mizoram hi ei leh bara a intodelh a, kan ram Mizoramah lo neihna lama hmasawnna nasa tak Green Revolution a thlen theih nan AMFU chuan theih tawp chhuahin tun thlengin hma a la ve reng a ni.

He a thil tum Green Revolution tihhlawhtling tur hian AMFU chuan Seminar huaihawt a tul hlein a hria a, mahse seminar huaihawtna tur sum AMFU in a neih loh avangin, Director, Department of Agriculture (CH), Govt of Mizoram chu a dawr ta a. Director chuan AMFU ngenna chu  lo ngaipawimawhin, kuthnathawktute hmasawna atan Seminar huaihawtna tur pawisa an tum thei ta hlauh a, chumi avang chuan MIZORAM FARMERS’ SEMINAR ON GREEN REVOLUTION AND CHANGKHAM TECHNOLOGY chu hlawhtling taka huaihawt a lo ni ta a ni.

SEMINAR HMAN DAN TLANGPUI:

Mizoram Farmers’ Seminar on Green Revolution & Changkham Technology hi hun hnihah then niin – First Session leh Second Session ah then a ni a. He Seminar-ah hian Dr C. Lalzarliana Director, Agriculture Department (Crop Husbandry) chu khuallian (Chief Guest) a ni a, Pu DK. Mishra, General Manager NABARD Regional Office Aizawl chu Khual Zahawm (Guest of Honour) a ni bawk.

FIRST SESSION:

He hun hi chawhma lam dar 10:00 am ah tan niin Pu Joseph H.Thanzuala President, AMFU chuan a kaihruai a. Pu Zuala hian devotion leh palai lawmna thu bakah AMFU chuan Mizoram hi ei leh bara alo intodelh ngei theihnan chak taka hmalak zel a tum thu a sawi a. Heng thil pathum pawimawh bik awm miah lo Economic Development, Environment & Eco system leh Education reform ahte hian hmalakna thar leh chak zawk a awm ngei theihnan AMFU chuan theihtawp chhuahin hma a lak zel tur thu Pu Joseph H Thanzuala, President AMFU chuan a sawi bawk. 

Hemi zawh hian Pu Zion Lalremruata General Secretary AMFU General Headquarters  chuan AMFU-in Kum 2015-a Kum Puan a siam “Buh Thar Tam Kum” bawhzuina leh hmalak dan report a pe a. He Kum Puan chhunga Tlangram lo(Tuklawr lo) leh Leilet(WRC) a Buh thar tam Loneitu (Farmers), heng a hnuaia hming tarlan te hnenah hian lawman Thuziakmawi (Citation) leh pawisafai pek an ni a. He lawman hi Khuallian (Chief Guest) Pu Dr C Lalzarliana, Director, Agri. Deptt. (CH) leh Khualzahawm (Guest of Honour) Pu DK Mishra, General Manager, NABARD ten a dawngtu tur te hnenah an hlan a ni.

AMFU Kum Puan hun chhunga Buh thar tam lawman dawngtute chu –

Tlangram Lo (Tuklawr Lo) a lawmman dawngtute:

1.      Lawmman pakhatna dwngtu: Hrangchhuana S/o Rochana, Sialhawk,

Buh thar zat: Tin 1048, Lo zau zawng 4½ Acre

Lawmman dawn:  Citation leh pawisafai Rs 10000/-

2.      Lawmman pahnihna dawngtu: Kailuia S/o Thankhuma, Sialhawk

Buh thar zat:  Tin 957, Lo zau zawng 4 Acre:

Lawmman dawn: Citation leh pawisafai Rs 7000/-

3.      Lawmman pathumna dawngtu: Lunghnema S/o Rohnuna, Sialhawk

Buh thar zat: Tin 714, Lo zau zawng 6 Acre

Lawmman dawn: Citation leh pawisafai Rs 5000/-

Leilet (WRC) a lawmman dawngtute:

1.      Lawmman pakhatna dwngtu: Kapbuaia S/o Hrangkianlova, Champhai

Buh thar zat: Tin 1570, Leilet zau zawng : 30 bighas

Lawmman dawn : Citation leh pawisafai Rs 10000/-

2.      Lawmman pahnihna dawngtu: B. Zuamsanga S/o Kualkhama, Phura Saiha Dist.

Buh thar zat: Tin 1370, Leilet zau zawng : 2½ Ha.

Lawmman dawn : Citation leh pawisafai Rs 7000/-

3.      Lawmman pathumna dawngtu: R.Lalrawngbawla S/o R. Zahuata, Phura, Saiha Dist.

Buh thar zat : Tin 1300, Leilet zau zawng: 3 Ha.

Lawmman dawn : Citation leh pawisafai Rs 5000/-

SEMINAR THUPUI ZIRHO LEH SAWIFIAHNA:

He hun hi Prof H.Lalramnghinglova, Sr Vice President AMFU General Headquarters chuan a kaihruai a. Seminar thupui “Green Revolution & Changkham Technology” chungchang kal khawmte hma-ah power point presentation a pe a, a sawifiah nghal bawk a. Prof. H. Lalramnghinglova chuan, Mizoram hi ei leh bara a intodelhna tur chuan, pi leh puten tunhma lama anlo chin than Changkham hmanga lo/huan siam a tul tawh zia leh he Technology, ho ang taka lang hi Mizoram intodelhnan te, soil erosion vennan te leh ramngaw siam thatnan a thatzia leh tangkaizia thiam takin a sawifiah nghal a. Thupui hi tangkai taka sawiho a ni.

THUSAWI:

1.      Khuallian (Chief Guest) Dr C.Lalzarliana, Director, Agriculture Deptt. (CH) chuan thu tha tak sawiin, sawrkar leh kuthnathawktute inkara thawhhona tha tak a awm theihnana AMFU-in hma ala thin chu lawmawm a tih thu a sawi a. Ram hmasawnna kawngah kuthnathawktute hnena zirtirna lam uar zawka kalpui zel turin AMFU chu sawm a. Sawrkarin development policy hrang hrangte tunlai technology tha tak tak hnuaiah a siam thina, heng policy hrang hrangte hi, tih hlawhtlin tum aia a ken tel sum um thin mi thahnem tak Mizoramin ala nei chu siam that ngai hlea a hriat thu sawiin, heng hi alo bo theihnan hemi kawng a chak zawka hma la turin AMFU a ngen a ni.

2.      Khual zahawm (Guest of Honour) Pu DK. Mishra General Manager NABARD pawhin thusawiin, tun hnaiah NABARD project thenkhat AMFU-in a enkawlte a tlawh naah Mizoram farmers-te an taimain hna pawh an thawk nasa hle a ni tih ataka a hmuh thu a sawi a. Farmers ten an tharchhuah an phurh chhuahna tur kawng tha an nei lo chu a pawiin a veiawm a ti hle a. Hemi chungchangah hian Finance Minister  leh Secretary Agriculture Deptt Mizoramte a sawi pui tawh thu sawiin, farmers ten feh kawng tha zawk (farm link road) an neih ngei theihnan NABARD chu Loan pe tura an in hawn reng thu a sawi bawk a ni. Tin, Mizoram ah project hrang hrang bakah NLUP hnuaiah thlai thar nasa takin a pung thei dawna, heng hralhna tur hian Agriculture Marketing tha Mizoramah neih vat a tul hle a ni ati bawk.

SECOND SESSION:

Chawhnu (Second Session) hun hi Dr Chawngkhuma Chawngthu Finance Secretary, AMFU General Headquarters chuan a kaihruai a, Green Revolution leh Changkham Technology chungchangte ngun zawka inhrilhhriat anih bakah hmalak zel dan turte an sawi ho a ni a. Kalkhawmte ten thupui zirho atangin zawhna te zawtin, mithiam zawk ten an lo chhang zel a ni;

Pu K. Lalnundanga  Saitual hnen atangi Teak huan hlui a thil chin a that duh thu te ngaihthlak a ni a.  Pu C Sangluaia Saiha chuan Marketing chungchang sawiin, kan thlai tharte mumal taka hralhna tur market kan neih theih dan tur a zawt a. Pu Chawnghranga, Tlabung chuan, changkham chu a daih rei tawk loh avangin Terrace chu a that zawk thute a sawi bawk. Pu Vanlalrawna W. Phaileng chuan Changkham technology hmang turin kham tur thing an neih loh avanga an buai thu sawiin, engtia hmalak tur nge tih a zawt a. Tunlaiah chemical hmangin thlai kan enkawl ta em ni tih te, champhai zawl leilet te hi buh chinna atan hman vek theih a nih leh nih lohte a zawt bawk. Tin Pu H. Taithuama, Champhai te, PU H. Thansanga Lawngtlai te, Pu C. Lalhmangaiha Sangau te leh Pu Laltanpuia te hnen atangin thu tangkai leh zawhna tha tak tak ngaihthlak a ni bawk.

Heng bakah hian Buh thartam lawman dawngtu Sialhawk khua aiawh atangin thusawi ngaihthlak a ni a. Chawimawina leh lawmman an dawn avanga an lawm thu te a sawi bakah, Sialhawka AMFU hmalaknate ngaihnawm takin a sawi a, changkham technology pawh an thiam ang tawk tawkin an hmang thin tih a sawi bawk.

 He seminar ah hian Mizoram hmun hrang hranga AMFU hruaitute leh sawm bikte an kalkhawm a. Nilengin hun hlimawm leh hlawkthlak tak an hmang ho a, tlai dar 4:00pm velah Seminar chu tluang taka zawh a ni.  He Seminar hi Agriculture Department (CH) Govt of Mizoram chuan a sponsored a ni.

TLANGKAWMNA:

He Seminar hi Pathian kaihhruaina zarah tluang taka zawh a ni a. He hun hlu tak hman a nih theihna tura tha thawhtu zawng zawngte hnenah, a huaihawttu AMFU General Headquarters, Aizawl chuan lawmthu a sawi tak meuh meuh a. Mi pawimawh tak tak, he seminar hmang tura tha leh zung senga, hmun hrang hranga atanga lo tel zawng zawng te hnenah AMFU chuan lawmthu a sawi tak meuh a.

He min hmanpuitur Chief Guest a min tansak tu Dr. C Lalzarliana, Director, Deptt of Agri (CH), Govt of Mizoram chungah leh Guest of Honour a min tansaktu Pu DK Mishra, GM, NABARD, Aizawl te chungah AMFU chuan thinglung takin lawmthu a sawi tak meuh a. An thusawi tha tak tak te kha Mizoram kuthnathawktute tan a tangkai em em a, AMFU chuan a hre reng dawn a ni.

A tawp ber atan he Seminar huaihawt a nih theihna chhan bul ber, seminar senso tumtu Department of Agriculture (CH), Govt of Mizoram chungah kuthnathawktute aiawhin AMFU chuan lawmthu a sawi tak meuh meuh a. Sum indaih lohna nasa tak karah, Farmers te dinchhuahna tur leh lei rem an rah vena tura hmalakna chikhat , he Seminar huaihawtna tur pawisa an tum hi AMFU chuan a ngaihlu takzet a, an insennate hian rahtha a thlen ngei AMFU chuan a beisei a, theih tawpa hmalak zui zel a tum a ni.

He Seminar lo tel zawng zawngte, tha leh zung bakah sum leh pai sengtute bakah, Department lama kan hotute leh sorkar mi pawimawh zawng zawng te, Mizoram a kuthnathawktu (Farmer) te dinchhuahna tura AMFU in hma a lak leh zelna turah, in mi tawimawhna leh thawhpuina hmuh zel kan beisei.

 (ZION LALREMRUATA)

Date Aizawl, the 31^st May, 2016                                                                          General Secretary

                                                                                     AMFU General Headquarters, Aizawl